3個月，由唔識到考三級。
妳12月黎試堂時問我可唔可以，我好決斷咁同妳講「無可能」，而且學完呢三個月，妳應該以後都唔會再想彈琴。
但妳堅持要試，令我知道妳真係好需要呢張cert。
第一堂我仲教緊time signature，之後所有嘢好似影片fast forward 咁發生：買琴、揀歌（要妳鍾意而我又覺得妳處理倒）、妳每星期風雨不改黎上兩堂（除咗妳去英國嗰十日……）。
如果考試係一場遊戲，我知道點樣可以過關，點樣可以高分。
但我唔想預測結果，只係諗點樣喺咁短時間內教識妳四首歌。
直至妳用一個月練到隻Sad Ghost有版有眼（係由唔識彈琴練倒隻歌成形），我先真正睇到一直存在係妳心入面團火。
呢三個月我寬嚴並進train妳上考場：點樣練最有效、chord progression 點記、情感演繹音色點樣到位。其他我控制唔到。
妳手指唔夠靈活同力量，快歌只能當慢歌彈，細節位靠相對容易的技巧（即係tricks…)蒙混過去。技巧唔紮實，但演繹搭夠。
期間妳仲有一份full time 同開緊網店，好難想像妳每晚練琴練到幾點。
好在妳好多嘢一講就明 — 妳後生、聰明、知性、有音樂感 — 少一樣都未必練倒同樣效果。
直到上星期錄影。Ready未？未ready，不過無時間了，只能盡力。
錄完妳問我可唔可以合格。
答案由「無可能」變咗做「borderline」。
「如果我係考官，按住ABRSM 個guideline 俾分，我會俾妳合格。」算係安撫妳又好，算係我的主觀願望又好。
* * *
收倒成績嗰一刻，我幾乎嗌出黎。
多謝妳證明俾我睇，凡事皆有可能。
老土都係嗰句，成就真係睇呢啲 —目標、決心、堅持、努力。
其實無論紙上面合唔合格，妳都打動咗我。
妳仲話而家無唔鍾意彈琴，咁我就更安慰。